Saha verður frá næstu vikurnar

Louis Saha, framherji Man. Utd, verður frá næstu vikurnar og gæti farið svo að hann yrði ekki leikfær fyrr en í nóvember. Saha á við meiðsli að stríða í hægra hné sem tengist brjóskinu í hnénu og þarf á aðgerð að halda til að hljóta bót meina sinna. Saha hefur verið orðaður við sölu frá Man. Utd að undanförnu og hafa Monaco og Everton lýst yfir áhuga á að fá hann í sínar raðir. Talsmaður Man. Utd gat ekki sagt nákvæmlega hversu lengi Saha yrði frá - sagði aðeins að fjarvera hans myndi standa yfir í nokkrar vikur.