Ikea flytur inn næsta haust

Framkvæmdir eru hafnar við byggingu tæplega 21 þúsund fermetra stórverslunar Ikea í Urriðaholti í Garðabæ. Gert er ráð fyrir að Ikea flytji í nýja húsnæðið næsta haust og loki þá um leið versluninni í Klettagörðum. Gengið hefur verið frá því að Byko byggi tólf þúsund fermetra verslun í Urriðaholti og hefjast framkvæmd­ir eftir áramót.

Stefnt er að því að Byko flytji inn sumarið 2007. Áður hafði verið unnið að því að þýska byggingavöruverslun­in Bauhaus opnaði stórverslun í Urriðaholts­landi en í haust var horfið frá þeim áformum. Þetta var eftir að Ásdís Halla Bragadóttir sagði upp starfi sem bæjarstjóri í Garðabæ og tók við starfi forstjóra Byko.

Urriðaholtsland er í eigu Urriðaholts, sem er í eigu Oddfellowreglunnar að meirihluta og Hagkaupsbræðranna Jóns og Sigurðar Gísla Pálmasona.

Landið í heild sinni er talið vera hundraða milljóna króna virði, sérstaklega er það verðmætt við Urriðaholtsvatn. Ágreiningur hefur verið um bygg­ingu bílastæða á landinu og hefur Landvernd gagnrýnt að teknir séu tuttugu þúsund hektarar undir bílastæði í stað þess að byggja bílastæðahús eða bíla­kjallara á landi sem telst náttúruminjasvæði. Lilja Pálmadóttir myndlistarkona er í stjórn Landverndar.