Strætó bætir við leiðum

Stjórn Strætó bs. ræðir nú leiðir til úrbóta á leiðakerfinu, að sögn Bjarkar Vilhelmsdóttur formanns stjórnar Strætó. Breytingarnar munu taka gildi í febrúar ef um semst, en þær fela meðal annars í sér að bætt verður við þremur nýjum leiðum, tveimur í Reykjavík og einni í Kópavogi og öðrum leiðum verður breytt.

"Þetta er unnið með tilliti til fjárhagsáætlunar og kostnaðar­skiptingar milli sveitarfélaganna," segir Björk. "Reykjavík er að fara fram á töluvert meiri þjónustu og er tilbúin til að greiða fyrir það. Við teljum, að með þeim hugmyndum sem stjórnin fjallar nú um sé verið að koma til móts við stóran hluta þeirra ábendinga sem við höfum fengið vegna nýja leiðakerfisins."

Björk segir að leiðirnar sem unnið verði með tengist Efra-Breiðholti, Mjódd og Suðurlandsbraut. Einnig Norð- Austurhverfunum við Bústaðaveg og Hlemm, Nýbýlavegi og Hamraborg í Kópavogi, Hamra­hverfi í Reykjavík, svo og Hamrahlíð. Í athugun sé að tengja Grafarholtið við Hlemm.

"Við teljum að orðið geti mjög góð sátt um þetta," segir Björk og bætir við að nú sé unnið að því að fjármagna breytingarnar. Ekki sé ljóst hversu mikill kostnaðurinn verði, en ljóst sé að viðkomandi sveitarfélög þurfi að bæta inn í rekstur Strætó bs.

Að sögn Harðar Gíslasonar, aðstoðarframkvæmdastjóra Strætó bs., hefur farþegum Strætó fækkað um 6-8 prósent milli ára miðað við fyrstu tíu mánuðina 2004 og 2005.

"Í sjálfu sér kemur þessi fækkun okkur ekkert á óvart allra fyrsta kastið," segir Hörður. "Þetta var gífurleg aðgerð, að leggja gamla leiðakerfinu og taka upp nýtt. Menn hafa rætt hvort þetta samanburðartímabil væri ekki of stutt, hvort það þyrfti ekki að vera 18 eða jafnvel 24 mánuðir. Það liggur hins vegar á borðinu að samdrátturinn í farþegafjölda hefur aukist núna. Einkabílasalan hefur þar vafalaust áhrif, því hún hefur aldrei verið meiri en nú. Þegar hefur dregið úr henni hefur orðið aukning hjá Strætó. Það er greinilega langtímaferli í gangi og við tengjum það við einkabílinn."