Nistelrooy verður fyrirliði gegn Lille

Sir Alex Ferguson er sagður muni láta hollenska markaskorarann Ruud van Nistelrooy hafa fyrirliðabandið í leiknum gegn franska liðinu Lille í Meistaradeildinni annað kvöld, en mikil meiðsli í herbúðum liðsins gera það að verkum að enginn þeirra sem borið hafa fyrirliðabandið í gegn um árin verða með annað kvöld.

Roy Keane, Gary Neville, Paul Scholes og Ryan Giggs geta ekki spilað vegna meiðsla eða leikbanna og því hefur mikið verið rætt um hver muni fá bandið annað kvöld. Varnarmaðurinn Rio Ferdinand hefur að vísu verið fyrirliði áður, en hann hefur ekki verið með bandið um handlegginn síðan hann kom sér í ónáð hjá stuðningsmönnum liðsins með því að draga lengi að undirrita nýjan samning við félagið.

Ruud van Nistelrooy mun því að öllum líkindum taka við bandinu gegn Lille annað kvöld, þrátt fyrir að markvörðurinn Edwin van der Sar sé í raun fyrirliði hollenska landsliðsins fram yfir Nistelrooy.