Kvótinn seldur til að fjármagna kaupin

Akureyri missti frá sér varanlega sem nemur um eða yfir sex þúsund tonna kvóta á síðustu tveimur fiskveiðiárum. Samkvæmt svari sjávarútvegsráðherra við spurningum Jóhanns Ársælssonar, þingmanns Samfylkingarinnar, má rekja þetta að mestu leyti til sölu Brims hf. á kvóta. Auk þess hafa Samherji og Brim leigt frá Akureyri um sextán þúsund þorskígildistonn á sama tímabili. Ekki kemur fram í svarinu hvaða fisktegundir bera uppi þessi kvótaviðskipti en ætla má að í tilviki Samherja sé umtalsverður hluti viðskiptanna í uppsjávartegundum.

Jóhann Ársælsson telur að eigendur Brims selji kvóta og leigi til þess að fjármagna kaupin á félaginu. "Svoleiðis er skotið stoðum undir kaupin sem voru óraunhæf miðað við rekstur fyrirtækisins," segir Jóhann. Hann bætir við að nú upplifi Akureyringar að kvótinn geti farið frá þeim eins og öðrum.

Guðmundur Kristjánsson, forstjóri Brims, segir að kvótinn fari milli nokkurra tengdra hlutafélaga. Á hans snærum séu til dæmis útgerðirnar Sólbakur og Tjaldur.

"Í fyrra veiddum við nokkurn veginn upp í allar okkar heimildir á eigin skipum. Svar sjávarútvegsráðherra gefur villandi mynd. Fyrirtækin okkar eru oft að geyma kvóta hvert fyrir annað. Það breytir ekki öllu hvar skip okkar eru skráð. Það er ekki hægt fyrir útgerðarfyrirtæki að halda úti byggðastefnu," segir Guðmundur.

Hann nefnir sem dæmi að nú sé Grindavík kvótahæsta höfn landsins og það sé vegna þess að skip eru skráð þar. "Okkar stefna er sú að við reynum að vinna okkar aflaheimildir en það er áramunur á þessu. Sum árin tökum við kvóta á leigu en önnur ár leigjum við frá okkur."

Guðmundur þvertekur fyrir það að hann selji kvóta til þess að fjármagna kaupin á Brimi.

"Það eru margir hér fyrir norðan sem hafa áhyggjur af því að Brim sé að færa starfsemina vestur á bóginn. Ég er alveg sannfærður sjálfur um að Samherji er ekkert að selja frá sér aflaheimildir. Þeir hafa mjög mikinn áhuga á síldinni," segir Sverrir Leósson,útgerðarbóndi á Akureyri.