Menningarsamstarf farið undir hnífinn

Mennta- og menningar­málaráðherrar Norðurlanda hafa staðfest ákvörðun sína frá því um miðjan júní um endurskipulagningu í samstarfi Norðurlandanna á sviði mennta- og menningarmála. Tillagan var samþykkt á fundi mennta- og menningarmálaráðherranna á Norðurlandaráðsfundinum í gær. Breytingunum er ætlað að leiða til aukinnar skilvirkni og sveigjanleika í samstarfinu og verður fé sem sparast notað til að styrkja ný og afmörkuð eða tímabundin verkefni í þágu allra aðildarþjóðanna. Níu af tuttugu nefndum og stofnunum í menningarsamstarfinu verða lagðar niður en sambærilegri starfsemi verður þó haldið áfram innan nýja skipulagsins. Samkvæmt samþykktinni verður blaðamannaskóli Norðurlandaráðs í Árósum lagður niður sem og myndlista-, tónlistar- og bókmenntastofnanir. Einnig verður Norræna safnanefndin lögð niður. Lögð verður niður samstarfsnefnd á sviði menningar og fjölmiðlunar, nefnd sem fjallað hefur um barna- og unglingamenningu sem og ráð sem skipulagt hefur norræna menningarviðburði utan Norðurlandanna. Menningarsjóður Norðurlanda, Kvikmyndasjóður Norðurlanda og norrænu húsin á Íslandi, Grænlandi, Færeyjum, Álandseyjum og í Helsinki halda velli. Menningarmálaráðherrarnir ákváðu einnig stefnumið fyrir þær tvær áætlanir sem fyrst verður hrint í framkvæmd á næsta ári í samræmi við nýtt skipulag. Önnur nær til ferðastyrkja og gestaíbúða fyrir listamenn. Hin tillagan fjallar um að þróa tölvuleiki fyrir börn og unglinga. Með nýju skipulagi samstarfs á sviði menningarmála er ætlunin að ábyrgð viðkomandi ráðherra og ráðuneyta verði skýrari en áður. Nýtt skipulag fyrir menningarsamstarfið tekur að fullu gildi á árinu 2007. Norðurlandaráð áætlar að verja um 1,5 milljörðum króna til menningar- og menntamála á næsta ári. johannh@frettabladid.is