Kaupa sig inn í biðröð eftir bóluefni

Lyfjaframleiðendum eru greiddar háar fjárhæðir á hverju ári af löndum sem vilja tryggja sér bóluefni gegn fuglaflensu ef og þegar á þarf að halda. Norðmenn greiða hollenskum lyfjaframleiðanda, Solvey, sem svarar tæpum 56 milljónum íslenskra króna gegn því að fá að minnsta kosti fjórar milljónir bóluefnisskammta ef flensan skellur á. Þeir sem borga sitja fyrir með bóluefni.

Haraldur Briem, sóttvarnalæknir hjá landlæknisembættinu, segir að tryggingagjald af þessum toga veiti ekki fullkomið öryggi fyrir því að bóluefnið fáist jafn skjótt og í jafn miklum mæli og gerður samnningur kveði á um.

"Við erum að athuga þetta og sjá hvað best er að gera í stöðunni," segir hann. "Við höfum samflot með Norðurlöndunum. Verði hafin framleiðsla á Norðurlöndunum breytist væntanlega samningurinn sem Norðmenn hafa gert."

Spurður hvort íslensk stjórnvöld og heilbrigðisyfirvöld hafi athugað möguleikann á að greiða tryggingagjald til að sitja að bóluefni segir Haraldur að verið sé að kanna alla möguleika. Hann ítrekar að ýmsir telji þetta ekki mikla tryggingu þegar upp sé staðið.

"En við verðum að hafa vaðið fyrir neðan okkur og fylgjast með markaðnum meðan beðið er eftir frekari ákvörðunum um eigin framleiðslu. Það eru allir möguleikar athugaðir," bætir hann við.

Hér á landi eru nú til um 89 þúsund skammtar af bóluefni. Þeir verða notaðir til meðferðar gegn fuglainflúenslu berist hún hingað og til að verja heilbrigðisstarfsfólk smiti.

"Það er hægt að nota þetta sem fyrirbyggjandi aðgerð gegn flensusmiti," segir Haraldur. "Flestir hugsa sér að nota það í meðferð, þannig að því verði ráðstafað á sem skynsamlegastan hátt. Sé lyfið notað á fyrirbyggjandi hátt þarf fólk að nota það mjög lengi. Það yrði óhemju kostnaðarsamt ef allir tækju það í fyrirbyggjandi skyni. Ég reikna með að bóluefnið yrði notað til að verja heilbrigðisstarfsfólk sem sinnir veiku fólki."