Á þriðja þúsund konur komu saman í Sjallanum

Konur á Akureyri héldu baráttuhátíð sína í gær í Sjallanum og var húsið orðið yfirfullt tæpum hálftíma áður en skipulögð dagskrá hófst klukkan 15. Sárafáir karlmenn mættu á hátíðina en að mati Sólveigar Hrafnsdóttur, sem þátt tók í undirbúningnum, voru á milli 2.000 og 2.500 konur í Sjallanum og þurfti hópur kvenna að hlýða á dagskrána utandyra þar sem ekki komust fleiri inn.

"Við erum ofboðslega ánægðar með samstöðu kvenna á Akureyri og mætingin var langt umfram okkar björtustu vonir. Kvennafrídagurinn olli bylgju á meðal þjóðarinnar fyrir 30 árum og ekki ólíklegt að slík verði raunin núna þó svo baráttumálin séu kannski ekki þau sömu," segir Sólveig.

Sumum vinnustöðum á Akureyri var lokað upp úr klukkan 14 í gær og á öðrum gekk starfsemi hægt fyrir sig þar sem vinnuveitendur gáfu konum almennt leyfi til að sækja baráttuhátíðina í Sjallanum. Þar á meðal voru allir stóru vinnustaðirnir á Akureyri: Fjórðungssjúkrahúsið, Háskólinn og Akureyrarbær.