Stefnir að lögum fyrir jól

"Mér sýnist ein­sýnt að við förum í einhvers konar laga­setningu en hún þarf að taka mið af okkar alþjóðlegu skuld­bind­ingum, ekki sýst varðandi EES samninginn," segir Árni Magnús­son félag­s­málaráðherra um starf­semi starfsmannaleiga.

"Við erum að fara yfir hvort setja beri um þetta sérlög, eða fella ákvæði inn í önnur lög. Hvort tveggja kemur til greina." Árni segir vonir standa til að takist að klára lagasetninguna fyrir jól. "En það er þó ekki alveg einfalt mál. Við höfum fjallað um málið í nefnd í allangan tíma, en ég vona að við sjáum til lands í því og hægt verði að taka þetta til umfjöllunar í þinginu fyrir jól." Árni segist munu funda á mið­viku­daginn með forystu ASÍ um málið. "Lagasetning um starfs­manna­leigur er eitt af því sem ASÍ hefur metið sem svo að muni skipta veru­legu máli þegar vonandi kemur að því að framlengja kjarasamninga. Þannig að við tökum það auðvitað alvarlega."