Ráðherra lét leiðrétta launamuninn

Árni Magnússon félagsmálaráðherra lét fara ofan í saumana á launum starfsfólks félagsmálaráðuneytisins til þess að kanna hvort þar fyrirfyndist kynbundinn launamunur. Hann komst að því að svo væri og hrinti í kjölfarið af stað áætlun sem miðast að því að eyða launamun kynjanna, bæði hjá hinu opinbera og í einkageiranum.

"Laun hvers einasta starfsmanns voru skoðuð og í ljós kom að í sumum tilfellum var til staðar launamunur milli einstaklinga sem ekki var hægt að skýra öðruvísi en út frá kyni. Við réðumst strax í að leiðrétta það," segir hann.

Árni segir niðurstöðurnar hafa komið sér á óvart en þær séu jafnframt til marks um það hversu dulinn hinn kynbundni launamunur er. "Frá því að þetta var gert í ráðuneytinu hef ég lagt mjög þunga áherslu á það við forystumenn stofnana sem heyra undir ráðuneytið að þeir fari í sams konar vinnu," segir Árni.

"Ég vildi sjá þetta gert í öllum ráðuneytum," segir hann. Þá segist Árni hafa velt því mikið fyrir sér hvaða leiðir hægt sé að fara til þess að bregðast við launamun kynjanna í einkageiranum.

"Það er að sjálfsögðu bannað samkvæmt lögum að mismuna fólki í launum út frá kynferði en munurinn er samt sem áður til staðar," segir hann. "Hægt væri að skerpa betur þetta ákvæði lagalega en að mínu viti ætti frekar að reyna að gera það eftirsóknarvert hjá fyrirtækjum að geta sagt frá því að viðkomandi fyrirtæki líði ekki launamun kynjanna," segir Árni. Með það að markmiði hefur hann ákveðið að setja saman hóp sem samanstendur af stjórnendum í atvinnulífi og opinberum aðilum sem vinna á gæðakerfi þar sem sett verði upp viðmið og staðlar sem mæli kynbundinn launamun innan fyrirtækja.

"Markmiðið er að koma á fót gæðavottun um jöfn laun sem hægt verði að veita þeim fyrirtækjum sem uppfylla þau skilyrði sem sett hafa verið um launajafnrétti og geta þá fyrirtæki sem vilja skara fram úr sótt um slíka vottun," segir Árni.

Árni segist hafa hvatt konur í félagsmálaráðuneytinu til að taka þátt í kvennafrídeginum í dag en ekki síður hafi hann hvatt karlana til þess að bregðast við á jákvæðan hátt og ganga í störf kvenna. Hann segir niðurstöður úr launakönnun VR ekki hafa komið sér á óvart í sjálfu sér.

"Þær sýndu hins vegar svart á hvítu að talsverður launamunur er enn á milli kynja. Hann er hægt að skýra að hluta með ýmsum hætti en að sumu leyti virðist hann eingöngu ráðast af kynferði, sem er algerlega óþolandi," segir Árni.