Flestum leikskólum lokað

Sökum þess að konur landsins ætla að leggja niður störf klukkan 14.08 í dag verður flestum leikskólum á höfuðborgarsvæðinu lokað. Gerður G. Óskarsdóttir, sviðsstjóri menntasviðs Reykjavíkurborgar, segir að flestir leikskólastjórar hafi sent skilaboð til foreldra þar sem þeir óska eftir því að foreldrar sæki börnin sín fyrir klukkan 14.00. Hún á því von á að flestir leikskólar Reykjavíkur loki klukkan 14.08.

Gerður bætir við að flestir grunnskólar borgarinnar séu búnir á þessum tíma en vandræði gætu skapast hjá frístundaheimilum skólanna. Elín Thorarensen, framkvæmdastjóri Heimilis og skóla segist ekki mjög áhyggjufull yfir því að þetta eigi eftir að koma mikið niður á börnunum. Hún styður konur landsins og ekki hafi verið sérstaklega ályktað á stjórnarfundum félagsins um þau vandamál sem gætu skapast í dag. Hún bætir við að feður barnanna hljóti að geta sótt börnin og annast þau á meðan konur mótmæla.