Hvetur til að gagnrýni verði hætt

Valgerður Sverrisdóttir, iðnaðar- og viðskiptaráðherra, hvetur Framsóknarkonur til að láta af gagnrýni sinni á forystu flokksins. Eðlilegt sé að gagnrýna forystuna einu sinni en ekki í heila viku. Á heimasíðu Valgerðar rifjar hún upp stjórnmálaferil sinn og bendir ekki hafi nein mótmæli heyrst frá Framsóknarkonum, þegar hún varð ekki ráðherra árið 199 þrátt fyrir 12 ára þingsetu. Í pistli sínum segir Valgerður meðal annars: „það er sjálfsagt að halda til haga samþykktum flokksins í jafnréttismálum, láta til sín heyra og skamma þingflokkinn og formanninn dálítið hressilega einu sinni en ekki í heila viku eða meira." „Ég minnist þess ekki að það hafi allt snúið á haus þegar ég varð ekki ráðherra 1999 og ég minnist þess heldur ekki að svo hafi verið þegar Ingibjörg Pálmadóttir hætti og karlmaður kom inn í ríkisstjórnina í stað hennar." Landssamband Framsóknarkvenna heldur opinn fund í dag, en tilefni fundarins er að mótmæla þeirri ákvörðun þingflokks Framsóknarmanna að víkja Siv Friðleifsdóttur úr ríkisstjórn. Yfirskrift fundarins er: "Staða kvenna í framsóknarflokknum - aftur til fortíðar! Vér mótmælum allar!" Sigrún Magnúsdóttir fyrrverandi borgarfulltrúi og einn stofnenda Landssambands Framsóknarkvenna flytur framsögu og er búist við hún skjóti föstum skotum að flokksforystunni.