Tillaga um hækkun gjalda aldraðra

Gjöld fyrir heimaþjónustu, fæði og akstur í félagsstarf í Reykjavík hækka um tuttugu milljónir króna á næsta ári miðað við tillögur sem liggja fyrir í félagsmálaráði Reykjavíkur vegna gerð fjárhagsáætlunar næsta árs. Björk Vilhelmsdóttir, formaður ráðsins, segir að ekki sé verið að hækka gjaldið hjá þeim sem þurfi hjúkrun. Markmiðið sé að þeir sem fái umönnun, til dæmis við að fara á fætur á morgnana, greiði ekkert fyrir þjónustuna en þeir sem einungis nýti sér þrif í heimahúsi borgi fyrir þjónustuna. Um 87 prósent notenda heimaþjónustu greiða fyrir hana. Guðrún Ebba Ólafsdóttir, fulltrúi Sjálfstæðisflokksin í félagsmálaráði, segir að með þessu séu aldraðir og aðrir sem njóta þjónustunnar látnir greiða fyrir niðurskurð borgarinnar. "Það er verið að sækja tuttugu milljónir í vasa þeirra. Það er sama í hvaða búning Reykjavíkurlistinn setur hækkunina, það breytir því ekki að aldraðir þurfi að greiða tuttugu milljónum meira fyrir þjónustuna."