Mikill ávinningur af göngunum

Árlegur ávinningur Vesturlands vegna Hvalfjarðarganga nemur hálfum milljarði króna. Þá má rekja átján prósenta hækkun á fasteignaverði á Akranessvæðinu beint til Hvalfjarðarganganna. Þetta er meðal þess sem fram kemur í rannsókn á áhrifum Hvalfjarðarganga á búsetuþróun og búsetuskilyrði á Vesturlandi sem Samtök sveitarfélaga á Vesturlandi létu gera. Bróðurhluti hins fjárhagslega ávinnings íbúa Vesturlands vegna ganganna kemur í hlut íbúa á Akranessvæðinu, eða sem nemur 394 milljónum króna. Ávinningur Borgarfjarðarsvæðisins og Snæfellsness er um 50 milljónir á ári á báðum stöðum og Dalamenn græða sjö milljónir á göngunum. Vífill Karlsson, höfundur skýrslunnar, segir að bein áhrif Hvalfjarðaganganna á fasteignaverð séu einnig mikil og þannig hafi íbúðaverð á Akranessvæðinu hækkað um átján prósent vegna ganganna og verð íbúða annars staðar á Vesturlandi hækkað um þrettán prósent. Þá segir Vífill göngin hafa orsakað þriggja prósenta lækkun á vöruverði á Vesturlandi. Ein mikilvægustu áhrifin segir Vífill vera þau að íbúar Vesturlands séu mun bjartsýnni á framtíðarhorfur sínar eftir að göngin komu. Úrval atvinnu sé meira og atvinnuöryggi sömuleiðis. Hann segir það hafa komið mjög skýrt fram í rannsókninni að væntingar fólks á Vesturlandi séu allt aðrar og miklu betri eftir tilkomu ganganna og það verði að teljast einn stærsti þátturinn í áhrifum ganganna á líf fólks á Vesturlandi.