Krefur ráðherra um rökstuðning

Helga Jónsdóttir borgaritari hefur óskað eftir rökstuðningi félagsmálaráðherra fyrir því að hafa ráðið Ragnhildi Arnljótsdóttur lögfræðing í stöðu ráðuneytisstjóra í félagsmálaráðuneytinu. Ingibjörg Sólrún Gísladóttir, fyrrverandi borgarstjóri, segir það vera með ólíkindum að gengið sé fram hjá Helgu.  Sex sóttu um stöðu ráðuneytisstjóra í félagsmálaráðuneytinu. Þar af voru þrjú talin hæfust: Ragnhildur Arnljótsdóttir, Helga Jónsdóttir og Hermann Sæmundsson, settur ráðuneytisstjóri. Helga er lögfræðingur að mennt og hefur verið borgarritari frá árinu 1995. Hún hefur auk þess verið aðstoðarmaður forsætisráðherra, utanríkisráðherra og skrifstofustjóri í forsætisráðuneytinu um þriggja ára skeið.  Helga vildi ekki tjá sig um skipun ráðherra í stöðuna í dag að öðru leyti en því að hún hefði beðið um rökstuðning fyrir þessari ákvörðun.  Umsóknarfrestur um stöðuna var framlengdur í tvígang og komust sögur á kreik um að það hefði verið vegna umsóknar Helgu en vilji manna hefði staðið til að ráða Hermann Sæmundsson. Menn hafi óttast að ef það yrði gert yrði málið kært til kærunefndar jafnréttismála. Ingibjörg Sólrún Gísladóttir, fyrrverandi borgarstjóri, segir Ragnhildi Arnljótsdóttur mæta og hæfileikaríka konu og að hún eigi ekkert nema gott skilið. Það varpi hins vegar ekki rýrð á hana þótt dregið sé fram að í hópi umsækjenda hafi verið manneskja sem hafi hvað mesta reynslu og þekkingu á stjórnsýslu ríkis og sveitarfélaga, sem sé Helga. Ingibjörg segir það eiginlega óskiljanlegt að gengið skuli hafi verið framhjá Helgu og hún spyrji sig til hvers fólk, svo ekki sé talað um konur, skuli vera að leggja á sig mikla menntun, vinnu og þjálfun og uppskera svo ekkert í samræmi við það. Ingibjörg segist ekki vita hvað valdi í þessu tilfelli og kveðst eiginlega hætt að skilja hvað ráði gjörðum þeirra sem með völdin fara í þessu samfélagi. Hún segist samt halda að það hafi sitt að segja að Helga hafi verið náin samstarfskona Ingibjargar þegar hún var borgarstjóri, og jafnvel einnig að hún verið samstarfskona Steingríms Hermannssonar, fyrrverandi forsætisráðherra.