Leirbindiefni úr flugvél

Allt að 40 ferkílómetra svæði í miðlunarlóni Kárahnjúkavirkjunar, Hálslóni, getur farið undir leir þegar vatnsborð stendur sem lægst í lóninu. Samkvæmt upplýsingum frá Borgarskipulagi samsvarar þetta svæði allri "gömlu" Reykjavík, þar með töldu Breiðholti, Selásnum og Grafarvogi. Sérfræðingar hjá Landsvirkjun og Landgræðslunni leita nú ákaft leiða til að hefta fok á leir sem kynni að fara af stað ef hann nær að þorna, þegar lágt stendur í lóninu og það hvessir í veðri. Fínasta leirrykið rýkur út í loftið undir þeim kringumstæðum, að sögn Péturs Ingólfssonar verkfræðings hjá Landsvirkjun. Pétur sagði, að vatnsborð yrði að lægst í lóninu á vorin og kæmist í meðalári ekki aftur í fulla hæð fyrr en í byrjun ágúst . Umfangsmiklar rannsóknir væri í gangi sem miðuðu að því að hefta fok úr lóninu yfir sumarmánuðina. Þar væru meðal annars væru í athugun möguleikar á að dreifa rykbindiefni úr flugvél Sveinn Runólfsson landgræðslustjóri hafði áður sagt við blaðið, að hann væri ekki trúaður á notkun rykbindiefna til að hefta leitfokið. en benti á afkastamiklar áveitur sem notaðar væru á stórum landbúnaðarsvæðum erlendis. "Við erum einnig farnir að huga að vökvun, það er að nýta árnar þarna til að renna niður á skipulagðan hátt, til þess að halda vissum flötum svæðum blautum," sagði Pétur. Hann sagði enn fremur, að verkfræðistofan Vatnaskil hefði reiknað út módel fyrir hversu mikið efni fyki út, hversu mikið efni væri á ferðinni í versta stormi ef ekki tækist að dæla á það og binda í tíma. Ef vatnsyfirborð í lóninu væri 570 metrar, sem það væri talið geta farið lægst, þá væru það 100 tonn af leir sem gætu farið af stað við verstu aðstæður, bætti Pétur við og undirstrikaði að við rannsóknarvinnu sína til varnar leirfoki miðuðu menn ætíð við ystu mörk.