Setur skilyrði fyrir sölu Símans

Framsóknarflokkurinn setur það skilyrði fyrir sölu Landssímans að lokið verði uppbyggingu dreifikerfisins þannig að landsbyggðin öll hafi aðgang að nútímafjarskiptum. Þá er rætt um að byrjað verði á því að bjóða almenningi að kaupa hlutabréf í Símanum. Þetta kom fram á fundi framsóknarmanna í Borgarnesi í dag. Það verður vart sagt að Halldór Ásgrímsson, formaður Framsóknarflokksins, hafi flutt „Borgarnesræðu“ í dag í þeim skilningi að stórar bombur hafi fallið þegar hann ræddi stjórnmálaviðhorfið við upphaf árlegs haustfundar þingflokks og landsstjórnar flokksins. Hann nefndi ekki forsætisráðuneytið, sem hann þó tekur við eftir fjóra daga, en ræddi meðal annars um aukningu viðskiptahallans sem hann sagði góðkynja vegna stóriðjuframkvæmda. Halldór skaut á hagfræðinga fyrir að gagnrýna útgjöld til utanríkisþjónustunnar og bað þá um að sleppa því að vera í pólitík. „Haldið ykkur við hagfræði, hagfræðina sem þið eruð að kenna nemendunum ykkar, og verið ekki með þetta rugl,“ sagði formaðurinn. Halldór minntist ekki orði á stöðu kvenna í flokknum. Þá ræddi hann heldur ekkert um tvö stórmál sem líkleg eru til að bera mjög hátt í umræðunni á næstunni: væntanlegar skattabreytingar og sala Landssímans. Eftir ræðu Halldórs kom hins vegar fyrirspurn úr sal um Landssímann sem Guðni Ágústsson svaraði. Hann sagði að fara þyrfti vel yfir það hvernig fyrirtækið yrði selt og sagði mögulegt að byrjað yrði að selja landsmönnum hluta líkt og var gert með Búnaðarbankann. Aðspurður hvernig ætti að ráðstafa tekjunum sagði hann að unnið yrði að stórkostlegum byggðaverkefnum, t.d. með ADSL-tengingum um allt land og bættu vegakerfi á þessu sviði. Hjálmar Árnason upplýsti að þingflokkurinn hefði sett skýr skilyrði fyrir sölu Landssímans: að lokið verði uppbyggingu dreifikerfisins þannig að landsbyggðin öll hafi aðgang að nútímafjarskiptum. Hann sagði það meginforsendu fyrir samþykkt flokksins.