Guttormur 12 ára gamall

Merkisnautið Guttormur á afmæli í dag 12. október og er orðinn 12 ára gamall. Guttormur býr í Fjölskyldu- og húsdýragarðinum þar sem hann deilir fjósi með kúnum Búkollu og Slaufu og tveimur nautkálfum sem enn hafa ekki fengið nafn. Dagurinn mun þó ganga sinn vanagang hjá Guttormi þrátt fyrir tímamótin enda er dýrunum hollast að hafa reglu á hlutunum. Venjulegur dagur í lífi Guttorms á þessum tíma árs er á þennan hátt. Dýrahirðar mæta í fjósið klukkan 07:00 og gefa Guttormi tæpt kíló af graskögglum og Guttormur lætur vita ef honum finnst hlutirnir ekki ganga nægilega hratt. Meðan kýrnar eru mjólkaðar gæðir Guttormur sér á heytuggu. Að mjöltum loknum fer Guttormur og kýrnar út rétt á meðan verið er að þrífa, en yfir sumartímann eru þau úti nær allan daginn. Þegar þau koma aftur inn er hey í jötunum hjá þeim sem þau gæða sér á allan daginn og taka á móti gestum í fjósið. Guttormur fékk dýnu að gjöf í tilefni 10 ára afmælisins sem hann liggur á meira og minna allan daginn. Seinni mjaltir hefjast klukkan 16:30 og þá fær Guttormur seinni skammtinn af graskögglunum, tæplega eitt kíló og nægju sína af heyi fyrir nóttina.