Nauðsynlegt prófmál

"Niðurstaða Hæstaréttar staðfesti eignarrétt landeigenda og ég óska þeim til hamingju með það," segir Geir H. Haarde, fjármálaráðherra. "Rétturinn tekur þó á hinn bóginn undir aðrar kröfur sem ríkið gerði." Hann segir að það hafi verið nauðsynlegt að reka málið alla leið í Hæstarétt til að fá skýra niðurstöðu um ákveðin grundvallaratriði sem kunna að hafa þýðingu í öðrum þjóðlendumálum. Nú sé niðurstaða fengin í eitt skipti fyrir öll. Það sé líka mikilvægt fyrir landeigendurna því héðan í frá verði ekki hægt að bera brigður á eignarrétt þeirra. Geir segir að nú verði farið mjög vandlega yfir forsendur dómsins og hvaða fordæmisgildi hann hafi. Í framhaldi af því verði tekin ákvörðun um stefnu ríkisins í öðrum þjóðlendumálum.