Ekki brot á jafnræðisreglu

Að synja fyrirtæki um leyfi til að reka verslun á svæði þar sem Nóatún rekur verslun í Grafarholti er ekki brot á jafnræðisreglu að sögn Steinunnar Valdísar Óskarsdóttur, formanns skipulags- og bygginganefndar Reykjavíkur. Steinunn segir að frá upphafi hafi það verið skýr vilji borgaryfirvalda að byggja upp verslunarkjarna við Kirkjustétt uppi á Grafarholti. Hugsunin hafi alltaf verið sú að aðeins ætti að heimila rekstur matvöruverslunar þar. Þegar aðalskipulagi hafi verið breytt þannig að ekki þurfti lengur að sækja um sérstakt leyfi fyrir verslunarrekstur hafi verið gerð ákveðin mistök. Ekki hafi verið nægilega vel skilgreint í skipulaginu hvar mætti reka verslun og því hafi borgaryfirvöld þurft að veita Nóatúni verslunarleyfi. Hún segir að þessu hafi strax verið kippt í liðinn og skilgreiningin þrengd. Aðspurð hvort lögmál hins frjálsa markaðar eigi ekki ríkja svo fyrirtæki geti opnað verslanir á þeim athafnasvæðum sem þau telji arðbær segir hún: "Við erum að reyna að reyna að skipuleggja hverfin þannig að þau séu lífvænleg fyrir fólkið. Þannig að gamalt fólk og unglingar geti til dæmis sótt þjónustuna á auðveldan hátt."