Ragnar í gæsluvarðhald

Taílensk yfirvöld framseldu um helgina Ragnar Sigurjónsson, fyrrverandi skreiðarútflytjanda, sem hvarf sporlaust í Lundúnum fyrir fimm árum. Í gær úrskurðaði Héraðsdómur Reykjaness Ragnar í gæsluvarðhald hér á landi til 23. ágúst. Ragnar, sem nú er 62 ára gamall var á sínum tíma sölustjóri í Sjvávarafurðadeild Sambandsins og sá þar meðal annars um útflutning á þurrkuðum þorskhausum til Nígeríu. Árið 1998 var gefin út ákæra á hendur Ragnari fyrir fjársvik í garð Nígeríumanns, sem greiddi honum á fimmtu milljón króna fyrir skreiðarfarm sem aldrei var afhentur. Ragnar mætti tvisvar fyrir Héraðsdóm Reykjaness, en nokkru áður en hann átti að mæta í þriðja skiptið, yfirgaf hann landið og fór til London, þann annan apríl árið 1999. Heimferð hans var áætluð tveim dögum síðar, en Ragnar varð eftir í London. Þegar ekkert hafði heyrst frá honum í nokkra daga fór fjölskylda hans fram á að leitað yrði að honum og var því haft samband við lögregluna í Lundúnum og lýst eftir honum af Interpol. Rúmum þremur mánuðum síðar hafði Ragnar svo samband við fjölskyldu sína og kvaðst kominn til Taílands. Í september árið 2000 samþykktu taílensk stjórnvöld svo beiðni um framsal Ragnars til Íslands. Það var síðan ekki fyrr en eftir að lögregla í Taílandi handsamaði Ragnar fyrir smáþjófnað þar í landi í maí á þessu ári að skriður komst í málið á nýjan leik. Úr þeirri vist var honum vísað úr landi með óformlegum hætti og kom hann hingað til lands á sunnudag í fylgd íslenskra lögreguþjóna. Hann var svo úrskurðaður í gæsluvarðhald til 23. ágúst í Héraðsdómi Reykjaness í gær og hefur hann þegar áfrýjað þeim úrskurði til Hæstaréttar.