Sagðist verða flokknum erfið

Siv Friðleifsdóttir hótaði því á fundi með þingkonum Framsóknarflokksins í janúar að ef hún missti ráðherrastólinn yrði hún ekki lengur hluti af liðsheildinni í flokknum. Þingflokksfundur hefur verið ákveðinn á morgun. Þá verður ákveðið hver Framsóknarráðherranna sex fær að verða óbreyttur þingmaður á ný 15. september. Þrír eru taldir koma til greina, Jón Kristjánsson, Siv Friðleifsdóttir og Árni Magnússon. Árni var síðastur Framsóknarmanna inn á þing en þykir þó ekki líklegur til að hætta sem ráðherra. Jón Kristjánsson þykir hafa unnið fyrir sínum stóli og vaxið í erfiðu starfi. Þá er Siv eftir, en hún er ritari flokksins, er með flest atkvæði allra Framsóknarmanna að baki sér og svo er hún kona. Sem kunnugt er hafa Framsóknarkonur látið í sér heyra undanfarið til að láta í ljós andstöðu við hugmyndir um að konum í ráðherraliði flokksins verði fækkað. Fréttastofan hefur rætt við mjög marga úr þingflokkinum í dag og eru skoðanir nokkuð skiptar þótt flestir séu á því að réttast sé að Siv fari. Þingmenn hafa fengið tækifæri til að ræða við formanninn undanfarna daga og mun hann á morgun leggja fram tillögu sem farsæl er fyrir flokkinn eins og það var orðað við fréttastofu í dag. Enginn þingmanna Framsóknarflokks var reiðubúinn að láta hafa nokkuð eftir sér varðandi málið í dag, en greinilegt er að óvissan hefur skapað töluverða togstreitu. Það telja aftur margir að flokkurinn megi alls ekki við nú þegar Halldór er að fara að taka við forsæti ríkisstjórnarinnar. Þrjá þingmenn þarf til að fella stjórnina og hafa menn talað um að ekki dugi að fjölga óvissuþáttum um of. Siv hótaði því á fundi með öðrum þingkonum flokksins í janúar að hún yrði flokknum erfið á þingi yrði henni sparkað úr ríkisstjórn. Þessi yfirlýsing féll að sögn í grýttan jarðveg.