Presturinn á Kirkjustétt

"Við vorum að kaupa okkur íbúð í Búseta og það vill bara svo skemmtilega til að hún stendur við Kirkjustétt," segir sr. Sigríður, þokkalega ánægð með að vera prestur á Kirkjustétt og fagnar því að auki að kirkjan í hverfinu mun að líkindum standa við götuna, aðeins steinsnar frá heimili hennar. Kirkjan er enn óbyggð en safnaðarstarf í Grafarholti fer fram í sal Félagsþjónustunnar í Reykjavík við Þórðarsveig. Skrefin frá heimili Sigríðar og yfir í kirkjuna verða fá þegar þar að kemur, sem býður óneitanlega upp á óvæntar uppákomur. "Ég kem til með að messa á sloppnum," segir hún og hlær. Næsta gata er svo Prestastígur og auðvitað renndi presturinn hýru auga til íbúða þar. "Vandamálið er hins vegar að þar eru aðallega Búmannablokkir og til þess að verða félagsmaður í Búmönnum þarf maður að vera orðinn fimmtugur að aldri." Sigríður á enn rúman áratug í fimmtugt en býst fastlega við að falast eftir íbúð við Prestastíginn þegar þeim virðulega aldri er náð. Hún lætur annars vel af störfunum í Grafarholtinu þó engin sé kirkjubyggingin og segir ákveðna kosti því samfara. "Maður kynnist svo mörgu fólki á að vera svona landsins sníkjudýr, þá þarf maður að hafa greiða af svo mörgum." Erindum og bónum Sigríðar er jafnan vel tekið og þessa daga stendur hún að skipulagningu fyrsta menningarkvöldsins í Grafarholti. Verður það 15. desember í salnum góða við Þórðarsveig og ætla rithöfundarnir Einar Már, Sigmundur Ernir og Þórarinn Eldjárn að lesa úr nýútkomnum bókum sínum. Ekki er að efa að íbúarnir fjölmenna og hlýða á skáldin. Sigríður lætur annars ágætlega af lífinu í hinu nýbyggða Grafarholti. "Hér er kominn nokkur hverfisbragur, fólk farið að heilsa og svona, þannig að hér er bara gaman."