Erill í verslunum í Bandaríkjunum

Það er jólastemning víðar en á Íslandi því jólainnkaupin eru hafin af fullum krafti í Bandaríkjunum. Í New York hófst hin eiginlega jólaverslun í gær, föstudaginn svarta, en það nefna verslunareigendur alla jafna daginn eftir þakkargjörðarhátíðina. Margir reyndu að lokka fólk til sín með alls konar gylliboðum. Þrátt fyrir nepju í stórborginni voru margir mættir fyrir allar aldir fyrir utan verslanirnar til þess að að gera bestu kaupin og krækja í eitthvað sniðugt í jólapakkana í ár. Öryggisgæsla hefur verið hert vegna jólaverslunarinnar.