Flestir telja að Siv ætti að víkja

Um þriðjungur þeirra sem afstöðu tóku í könnun Fréttablaðsins taldi að Siv Friðleifsdóttir umhverfisráðherra ætti að víkja úr embætti þegar Framsóknarflokkurinn missir einn ráðherrastól 15. september næstkomandi. Um fimmtungur var á þeirri skoðun að Halldór Ásgrímsson, verðandi forsætisráðherra og formaður Framsóknarflokksins, ætti að víkja. Samkvæmt samkomulagi stjórnarflokkanna færast umhverfisráðuneyti yfir til Sjálfstæðisflokksins þegar Davíð Oddsson lætur af embætti forsætisráðherra í haust og Halldór Ásgrímsson tekur við. Fækkar þá ráðherrum Framsóknarflokksins um einn en Sigríður Anna Þórðardóttir verður sjöundi ráðherra Sjálfstæðisflokksins og tekur við umhverfisráðuneytinu. Hlutfall óákveðinna og þeirra sem ekki vildu svara var um 45 prósent og þeir sem afstöðu tóku voru ekki endilega stuðningsmenn Framsóknarflokksins. Ekki var marktækur munur í könnuninni á afstöðu karla og kvenna að öðru leyti en því að talsvert fleiri karlar en konur vildu að Halldór Ásgrímsson viki sæti. Þá voru heldur fleiri á landsbyggðinni en í þéttbýli sem nefndu Siv Friðleifsdóttur. Næstur á eftir þeim Siv og Halldóri kom Guðni Ágústsson, landbúnaðarráðherra og varaformaður Framsóknarflokksins, en rúmlega 16 prósent vildu að hann missti sæti í ríkisstjórnina. Þar á eftir kom Jón Kristjánsson, heilbrigðisráðherra, með rúm ellefu prósent en ekki var marktækur munu á þeim Árna Magnússyni og Valgerði Sverrisdóttur sem komu best út. Könnunin var gerð síðastliðinn þriðjudag. Hringt var í 800 manns og spurt: "Hvaða ráðherra Framsóknarflokksins finnst þér að eigi að víkja úr embætti þegar flokkurinn missir eitt ráðherraembætti 15. september?" og voru svarmöguleikarnir núverandi ráðherrar flokksins.