Skipstrand nálægt Straumsvíkurhöfn

Tyrkneska súrálflutningaskipið Kiran Pacific strandaði á skeri 3.3 sjómílur norðvestur af Straumsvíkurhöfn í gærkvöldi. Alls er 21 maður um borð í skipinu, allir frá Tyrklandi. Skipið er talið nokkuð stöðugt á skerinu og því ekki óttast um að áhöfnin sé í hættu. Varðskip kom á vettvang í morgun og er áhöfn þess að kanna aðstæður og ástand skipsins. Kiran Pacific var að koma frá Bandaríkjunum með 45 þúsund tonn af súráli sem flytja átti til Straumsvíkur. Í skipinu eru um 450 rúmmetrar af svartolíu, 50 rúmmetrar af dísilolíu og 30 rúmmetrar af smurolíu. Skipið er tæp 22 þúsund brúttótonn og 193 metrar að lengd. Talið er að 3 göt séu á sjótönkum framarlega í skipinu. Ekki er vitað um göt á olíutönkum og ekki hefur orðið vart við mengun. Skipið strandaði klukkan sex í gær og barst tilkynning frá Hafnarfjarðarhöfn um það til stjórnstöðvar Landhelgisgæslunnar kl. níu. Von er á fulltrúum frá útgerð skipsins, tryggingafélags þess og hollensks björgunarfyrirtækis seinna í dag. Fulltrúar Landhelgisgæslunnar, Siglingastofnunar og Umhverfisstofnunar fylgjast grannt með framvindu mála og taka sameiginlega ákvörðun um aðgerðir.