Franskt drama af bestu gerð

Zinedine Zidane skoraði tvö mörk þegar komið var fram yfir venjulegan leiktíma og tryggði Frökkum sigur, 2–1, á Englendingum. EM í fótbolta Franska landsliðið sýndi í gærkvöldi hvers þeir eru megnugir þegar þeir sneru töpuðum leik gegn Englendingum í unninn í uppbótartíma. Frank Lampard kom Englendingum yfir með skalla á 38. mínútu og þrátt fyrir að David Beckham léti Fabien Barthez, markvörð Frakka, verja frá sér vítaspyrnu á 73. mínútu, virtist fátt benda til þess að Frakkar næðu að skora og jafna leikinn. Allt þar til ein mínúta var kominn yfir venjulegan leiktíma. Þá braut framherjinn Emile Heskey á Zinedine Zidane rétt utan teigs og Zidane lét sig ekki muna um að skora beint úr aukaspyrnunni, óverjandi fyrir David James, markvörð Englendinga. Tveimur mínútum síðar átti Steven Gerrard, miðjumaður Englendinga, síðan skelfilega sendingu aftur á David James, Thierry Henry komst inn í sendinguna og var felldur af James. Markus Merk, hinn geðþekki þýski tannlæknir, dæmdi umsvifalaust víti og úr því skoraði Zidane sigurmark leiksins. Nokkrum sekúndum síðar var flautað af – við höfum sennilega orðið vitni af bestu endurkomu allra tíma í knattspyrnusögunni. Frakkar voru allan tímann mun meira með boltann en Englendingar börðust hetjulega og gáfu engin færi á sér. Það er varla hægt að segja að Frakkar hafi fengið færi í leiknum en það var mikið reiðarslag fyrir þá þegar Frank Lampard skallaði aukaspyrnu Davids Beckham í netið á 38. mínútu, þvert gegn gangi leiksins. Frakkar sóttu áfram fram að hálfleik en komust lítið áleiðis gegn sterkri vörn Englendinga með Ledley King sem besta mann. Í síðari hálfleik hélt sama mynstur áfram því Frakkar voru meira með boltann en Englendingar beittu hættulegum skyndisóknum. Úr einni þeirra náði Wayne Rooney að krækja í vítaspyrnu. Hann stakk varnarmenn Frakka af og gat Mikael Silvestre ekki gert annað en að brjóta á honum. Eins og áður sagði tókst Beckham ekki að skora úr vítaspyrnunni, Fabien Barthez, markvörður Frakka, stökk eins og köttur í hornið og varði glæsilega. Lokakaflanum er svo lýst hér að framan – franskt drama af bestu gerð. David Beckham, fyrirliði Englendinga, viðurkenndi eftir leikinn að vítaspyrnan sem hann brenndi af hefði verið vendipunkturinn í leiknum. „Ef ég hefði skorað úr vítaspyrnunni hefðum við unnið leikinn. Ég viðurkenni það. Vítaspyrnan var ágæt en þetta var vel varið hjá Barthez. Við áttum ekki skilið að tapa leiknum því við vorum betri aðilinn nánast allan leikinn.“ Zinedine Zidane, hetja Frakka, þakkaði Fabien Barthez fyrir sigurinn. „Fabien gaf okkur vonina með því að verja vítið og hélt okkur inni í leiknum,“ sagði Zidane.