Skipin bundin við bryggju

Öll fjögur rækjuveiðiskip Íshafs á Húsavík liggja bundin við bryggju. Því veldur aflaleysi og hátt verð á olíu. Bergsteinn Gunnarsson, framkvæmdastjóri fyrirtækisins, segir skipin hafa veitt minna af rækju en gert hafi verið ráð fyrir þegar þau hófu veiðar á síðasta ári. Hann vonast til þess að veiðar verði hafnar að nýju eftir áramót. Á meðan sé rækjuvinnslu Íshafs haldið gangandi með aðkeyptri rækju sem veiðist á Flæmska hattinum. Bergsteinn segir svipaða stöðu vera hjá flestum útgerðum sem stunda rækjuveiðar. Reinhard Reynisson, bæjarstjóri Húsavíkur, segir að þrátt fyrir þetta sé ágætt atvinnuástand í bænum. Til dæmis sé verið að auglýsa eftir fólki til fiskvinnslustarfa. Hins vegar kunni það að hafa slæm áhrif ef ástandið verði viðvarandi. Bærinn tapi tekjum á því þegar umferð um höfnina minnki og þá kunni einnig að koma til uppsagna ef rækjuveiðin eykst ekki.