Íslenski hesturinn sló í gegn

Um 60.000 manns sáu og hrifust af íslenska hestinum á stórsýningu og keppni í Bretlandi nýverið, að sögn Jónasar R. Jónssonar umboðsmanns íslenska hestsins. Er þetta í fyrsta sinn sem Íslendingar taka þátt í þessum atburði. Til stendur að fylgja þessari mikilvægu kynningu vel eftir þar í landi. "Þetta er eins konar landsmót þeirra Breta," sagði Jónas. "Þarna fór fram umfangsmikil keppni, auk þess sem þrjú hestakyn voru sýnd sérstaklega. Það voru íslenski hesturinn, lífverðir Bretadrottningar á hestum sínum og Lipizzaneres, hvítu Vínar - hestarnir." Ellefu knapar sýndu tólf íslenska hesta á sýningunum sem, voru sjö talsins í höll sem tekur um 9000 manns í sæti. Hestarnir komu víðs vegar að úr Evrópu. "Aðdragandinn var sá, að einn af stjórnarmeðlimum sýningarinnar hafði séð íslenska hestinn á sýningu í Þýskalandi," sagði Jónas. "Hann hreifst svo af eiginleikum hans þar, að stjórnin spurðist fyrir hjá okkur um hvort við værum til í að koma með hesta og knapa á sýninguna. Við ákváðum að taka þátt og undirbúningur okkar hafði staðið mánuðum saman. Það varð úr og þarna var sýnd munsturreið og allar gangtegundir. Við heilluðum áhorfendur og þeir gripu andann á lofti og klöppuðu með. Þeir nutu til hins ítrasta að horfa á hestana og láta koma sér á óvart. Þeir vissu að hverju þeir gengu með öll önnur hestakyn, en þarna var eitthvað alveg nýtt á ferðinni."