Enn lifir í glæðum Arsenal

"Við áttum góðan leik fram að markinu og hefðum átt að leggja harðar að okkur en sem fyrr fáum við okkur ódýr mörk," sagði Greame Souness, stjóri Newcastle, eftir 3-1 tapleik liðsins gegn Liverpool á Anfield í ensku úrvalsdeildinni í gær. Tóku leikmenn Liverpool þrjú tiltölulega auðveld stig og auðvelduðu Souness ekki starf sitt. Hefur þeim farið fjölgandi undanfarið sem vilja kappann burt enda gengi liðsins undir hans stjórn verið slakt og var tapið á Anfield ekki til að laga stöðuna. Var Souness sjálfur fyrir miklum vonbrigðum. "Markið okkar var fallegt og vel að því staðið en tvö af mörkum Liverpool voru af ódýrari taginu og því miður er þetta ekki í fyrsta sinn sem við fáum slík mörk á okkur." Liverpool leit ekki út fyrir að vera til stórræðanna þegar leikurinn hófst en fyrsta mark Newcastle, sem Patrick Kluivert skoraði, virtist hafa kveikt neista sem ekki sást fyrr en þá. Aðeins þremur mínútum eftir markið hafði Liverpool jafnað þegar Titus Bramble skoraði sjálfsmark eftir hornspyrnu Kewell og öðrum þremur mínutum eftir það komst Liverpool yfir með marki Neil Mellor. Í seinni hálfleik var Liverpool allan tímann líklegra til að bæta við marki og á 61. mínútu tókst Baros að skora eftir frábæra sendingu frá Kewell. Arsenal mátti teljast heppið að fara frá Fratton Park í Portsmouth með stigin þrjú. Leikmenn Portsmouth báru litla virðingu fyrir Arsenal og ógnuðu marki aðkomumannanna nokkrum sinnum strax í byrjun leiksins. Þegar leið á leikinn fór leikmönnum Arsenal að ganga betur að sækja fram og á 75. mínútu fékk Sol Campbell frið fyrir utan vítateig Portsmouth og lét ríða af skot sem hafnaði í netinu. Arsenal er þá fimm stigum á eftir toppliði Chelsea eftir sigurinn og einu stigi á undan Everton í þriðja sæti.