Styrkur til barna

Árið 1875 voru ungar dömur fengnar til að prýða Austurvöllinn þar sem var verið að koma með styttu af Thorvaldsen.

Samstarf stúlknanna gekk það vel að þær ákváðu að stofna líknarfélag sem fékk nafnið Thorvaldsenfélagið. Árið 1901 var svo ákveðið að stofna verslun þar sem konurnar seldu handavinnu sína og gáfu ágóðann til góðgerðarmála. Verslunin starfar enn þann dag í dag og tilgangurinn er enn sá sami.

"Við erum reyndar ekki lengur að selja bara okkar eigin handavinnu enda tímarnir breyttir og margar konur uppteknar við annað," segir Sigríður Sigurbergsdóttir, sem er ein af meðlimum félagsins. Meðlimir félagsins starfa sem sjálfboðaliðar í versluninni og er alltaf einn sjálfboðaliði að störfum ásamt verslunarstjóra.

"Því miður virðist miðbærinn vera að deyja, en við vonum að við náum að rífa þetta upp. En þeir sem vita fyrir hvað við stöndum koma aftur og aftur og versla hjá okkur," segir Sigríður.

Eins og hér hefur verið tíundað rennur allur ágóði af versluninni til góðgerðarmála og hefur félagið meðal annars styrkt barnadeildina á Landakotsspítala á meðan hún var, svo barnadeildina á Borgarspítalanum. Þegar deildirnar sameinuðust undir Barnaspítala Hringsins var stofnaður sérstakur Thorvaldsensjóður sem er styrktarsjóður til handa sykursjúkum börnum og unglingum.