Vala á nóg inni ennþá

"Ég tel mig enn eiga nóg inni og vonast til að þessar breytingar verði til þess að ég nái árangri á ný," segir Vala Flosadóttir frjálsíþróttamaður, en hún og unnusti hennar, Magnús Aron Hallgrímsson kringlukastari, eru að flytja búferlum frá Gautaborg í Svíþjóð til Árósa í Danmörku. Afar lítið hefur borið á Völu um nokkurra ára skeið nú og hafa á meðan orðið miklar framfarir í stangarstökki en Vala setur það ekki fyrir sig. "Þetta snýst um metnað og vilja og ég hef nóg af báðu eins og sakir standa. Auðvitað hafa framfarir orðið og eiga eftir að verða meiri en ég vil meina að ég eigi enn nóg inni til að komast aftur í hóp þeirra bestu og ég er viss um að dvöl í Danmörku og breytt umhverfi mun hafa jákvæð áhrif á það." Í Árósum mun Vala æfa undir stjórn Lars Nielsen, danska landsliðsþjálfarans í stökkgreinum, en í borginni er Ólympíumiðstöð Dana og öll aðstaða fyrsta flokks. Unnusti Völu, Magnús Aron, mun einnig njóta góðs af enda mun hann aftur hefja samstarf við Véstein Hafsteinsson, sem er landsliðsþjálfari Danmerkur í kastgreinum. Vésteinn hefur náð þar góðum árangri enda hokinn af reynslu eftir áratuga starf og mun Magnús áreiðanlega njóta góðs af. Vala vill ekki meina að aðstæður í Svíþjóð séu á nokkurn hátt slæmar en hvorugt þeirra hefur þó náð sérstökum árangri síðan þau hófu æfingar þar fyrir nokkrum árum. "Það er rétt að ég er ekki mjög ánægð með þann árangur sem ég hef náð síðan ég kom hingað fyrir þremur árum síðan, sem er mjög svekkjandi þar sem ég veit að ég get meira. En ég vil meina að meðan metnaður er til staðar og viljinn til að leggja áfram hart að sér hefur ekki dvínað er hægt að opna allar dyr og á það mun reyna í Danmörku." Þau Vala og Magnús koma heim til Íslands milli jóla og nýárs til að hitta vini og ættingja en annars segir Vala ekkert í spilunum sem bendi til að þau komi heim til keppni á næstunni. "Það á auðvitað eftir að skýrast þegar fram líða stundir en eins og er keppi ég líklega lítið heima nema þá mögulega í sumar."