Stanslausar æfingar að skila sér

"Ég er mjög ánægður enda undanfarin ár kannski ekki verið ýkja góð hjá mér og ég gæli við að ná að halda þessu formi áfram," segir Björgvin Björgvinsson, skíðamaður frá Dalvík, en hann gerði sér lítið fyrir og náði fimmta sæti á sterku móti sem fram fór innanhúss í Hollandi í vikunni. Er árangur Björgvins sá næstbesti sem íslenskur skíðamaður hefur náð erlendis en kollegi Björgvins að norðan, Kristinn Björnsson frá Ólafsfirði, vann tvívegis sigur á Evrópubikarmótum á sínum ferli. "Einhvern veginn gekk allt upp hjá mér en það er tilfinning sem ég hef ekki fundið um langa hríð og ég er mjög bjartsýnn á að mér takist að halda þessum dampi í næsta móti. Fyrst og fremst er ánægjulegt að finna að allur sá tími sem hefur farið í stanslausar æfingar síðan í vor er að skila sér og ég er vaxandi sem skíðamaður." Fimmta sætið hjá Björgvini er enn betri árangur í ljósi þess að hann var 51. í rásröðinni en því aftar sem byrjað er því minni möguleikar á að ná góðum árangri enda versna aðstæður í brautinni því fleiri sem hana skíða. Björgvin tók einnig þátt í heimsbikarmóti sem fram fór í Sölden í Austurríki fyrir skömmu en féll í brautinni þar og lauk ekki keppni. Furðu vekur að skíðamót skuli yfirleitt vera haldin í Hollandi þar sem holt og hæðir eru vægast sagt af skornum skammti en til að vinna bug á því hafa Hollendingar byggt svokölluð skíðahús og þar fór umrædd keppni fram. Björgvin var himinlifandi með aðstöðuna og segir engan mun hafa fundið á því að keppa innanhúss og í brekkum utanhúss. "Þetta er sams konar tilfinning og að vera í alvöru brekkum og fyrir utan þakið á húsinu er enginn munur á að keppa inni eða úti. Mér skilst að þetta sé framtíðin í skíðaíþróttinni og mér finnst sjálfssagt að það verði skoðað heima á Íslandi að reisa svona hús. Það yrði lyftistöng fyrir íþróttina og hægt að skíða allan ársins hring."