Pósar í glergámi í Chicago

Fókus, sem fylgir með DV í dag, talaði við hina 25 ára gömlu Þóru Lind Möller, sem starfar sem módel í Bandaríkjunum. Hún var á sínum tíma valin Miss Teen Colorado og fór sem fulltrúi þeirra á aðalkeppnina í Flórída á sínum tíma. Þessa dagana er hún á sundbol í glergámi til að vekja athygli á utanlandsferðum til Mexíkó. Hún hefur einnig leikið í auglýsingum fyrir Budweiser. "Ég fæddist í Svíþjóð en er að mestu alinn upp á Íslandi. Ég bý núna í Chicago Illinois þar sem ég starfa sem módel," segir hin 25 ára gamla Þóra Lind Möller Leifsdóttir. Hún hefur búið í Bandaríkjunum undanfarin ár þar sem hún hefur m.a. lagt stund á nám í tölvufræðum og tamið hesta milli þess sem hún módelast. "Ég tek ekki þátt í neinu sem er klámfengið. Ég tek aðeins að mér verkefni sem eru falleg, skemmtileg og framandi og niðurlægja kvenmannslíkamann ekki á nokkurn hátt," segir Þóra Lind sem hefur m.a. setið fyrir í dagatali hjá Budweiser auk þess að leika í auglýsingum bjórrisans. Miss Teen Colorado "Hún var valinn Miss Teen Colorado þegar hún var 15 ára og fór á aðalkeppnina fyrir hönd Colorado í Flórída á sínum tíma. Mér finnst alltaf dálítið sérstakt að þeir hafi þurft að leita alla leið til Íslands til að finna nógu fallega stúlku til að vera fulltrúi ríkisins," segir móðir Þóru Lindar, Lilja K. Möller, í samtali við Fókus en hún er skiljanlega mjög stolt af dóttur sinni. "Undanfarið hefur hún verið að vinna niðri í miðbæ Chicago þar sem hún er á sundbol inni í glergámi ásamt fleira fólki. Gámurinn er fullur af pálmatrjám og öðru slíku en þær eru þau að auglýsa ferðir til Mexíkó fyrir ferðaskrifstofu," segir Lilja og bætir við að hún fái 50 dali á tímann fyrir þetta sem verður bara að teljast ágætt. Viðtalið við Þóru má lesa í heild sinni í Fókus, sem fylgir DV í dag, auk ýmislegs annars ótrúlega skemmtilegs efnis.