Börðust með bjór gegnum skaflana

Fyrsti Víking jólabjórinn er væntanlegur að norðan innan stundar. Víking jólabjórinn er bruggaður á Akureyri og er koma hans suður yfir heiðar eitt af merkjum þess að jólin eru á næsta leyti. Í fyrra var flogið með bjórinn suður en nú var bjórinn ferjaður landleiðina. Fyrstu kassarnir voru fluttir með ofurjeppum suður Kjöl í dag og fóru öflugir jeppar til móts við norðanmenn. Ferðin gekk brösótt, öflugir jepparnir börðust gegnum skaflana og festust að minnsta kosti tvisvar. Að lokum hittust hóparnir við Bláfellsás þar sem veigarnar voru afhentar. Áætlað er að komið verði með jólabjórinn til Reykjavíkur á sjötta tímanum og verður þá efnt til móttökuathafnar á Thorvaldsen við Austurvöll.