Tryggvi hugsar sér til hreyfings

"Það er alveg á tæru að ef þessi þjálfari verður áfram með liðið mun ég íhuga alvarlega að komast eitthvert annað," segir Tryggvi Guðmundsson, knattspyrnumaður með Örgryte í sænsku deildinni. Tryggvi var hetja liðs síns um helgina þegar hann skoraði sigurmark Örgryte á ögurstundu gegn Assyriska og tryggði þannig liðinu áframhaldandi setu í efstu deild í Svíþjóð. Ekki mátti tæpara standa því markið skoraði Tryggvi þegar tvær mínútur voru liðnar af uppbótartíma en jafntefli hefði þýtt að Örgryte, sem varð í fjórða sæti á þarsíðustu leiktíð, hefði fallið niður í 1. deild. "Það er ekkert launungarmál að ég er ekkert ánægður með stöðu mála og ég efast um að forsvarsmenn liðsins séu það heldur. Lið sem var meðal þeirra allra efstu áður en þessi þjálfari tók við hefur verið í fallbaráttu lengst af tímabilsins. Þetta skýrist mikið til í vikunni en þá verður fundað um stöðu mála innan félagsins en ég hef fullan hug á að skoða önnur tilboð ef ákveðið verður að þjálfarinn verði áfram. Ég veit af áhuga norskra liða og það myndi ég skoða alvarlega. Hins vegar viðurkenni ég að ákveðin heimþrá gerði vart við sig í sumar og ég held heim til Íslands fyrr en síðar." Þjálfarinn sem Tryggvi talar svo um tók við liði Örgryte fyrir þessa leiktíð. Kappinn er finnskur og náði aldrei tökum á liðinu þetta sumarið. Örgryte féll niður töfluna með svipuðum hraða og hlutabréf í Enron og vann aðeins sex leiki af alls 26. Liðið skoraði 24 mörk eða innan við eitt í leik en fékk á sig 35. "Það segir kannski allt sem segja þarf í þessum 26 leikjum sem liðið spilaði að í 22 þeirra var aldrei sama byrjunarlið. Slíkt hlýtur að fara illa í leikmenn enda verður sjálfstraustið aldrei mikið með því móti. Það sýndi sig svo berlega með stöðu liðsins í deildinni. Persónulega trúi ég ekki öðru en að hann verði látinn fara og þá er ég reiðubúinn að vera áfram enda á ég enn tvö ár eftir af samningi mínum." Þess má geta að sænska knattspyrnusambandið ákvað í gær að vegna bágs fjárhags liðs Örebro sem endaði í áttunda sæti Allsvenskan að dæma liðið niður um deild. Lið Assyriska sem Örgryte sigraði fer því upp í efstu deild í staðinn þrátt fyrir tapið.