Svaf yfir sig en skoraði 33 stig

Portland Trail Blazers var í heimsókn í Toronto og atti kappi við Raptors í NBA-deildinni í gær. Leikmenn Blazers máttu prísa sig sæla að mæta fullmannaðir til leiks því að framherjinn Zach Randolph svaf yfir sig og missti af flugi liðsins til Toronto. Má kappinn búast við sekt vegna þessa en hann dó ekki ráðalaus og fór á eigin vegum yfir landamærin. Blazers byrjaði leikinn betur en Raptors var þó aldrei skammt undan og náði yfirhöndinni í öðrum fjórðungi sem liðið vann, 31-18. Raptors lék vel á þessum kafla og náði mest 12 stiga forystu. Staðan í hálfleik var 51-42, heimamönnum í vil. Randolph og félagar í Blazers neituðu að gefast upp og söxuðu jafnt og þétt á forskot Raptors. Aðeins eitt stig skildi liðin að þegar fjórar sekúndur voru til leiksloka. Þá tók Vince Carter til sinna ráða og skoraði fjögur af síðustu fimm stigum Raptors meðan að leikmönnum Portland voru mislagðar hendur og Toronto stóð uppi sem sigurvegari, 101-97. Carter var stigahæstur heimamanna með 25 stig en svefnpurrkan Zach Randolph fór fyrir Blazers með 33 stig og 15 fráköst.