Konur með Sirrý

Sjónvarpskonan Sirrý er umvafin kvenfólki í störfum sínum á Skjá einum og sannast á þætti hennar, Fólki, að konum er jafn vel treystandi fyrir gerð sjónvarpsþátta og körlum. Jafnvel betur. Í stéttarfélögum blaða- og fréttamanna eru þrjár konur á móti hverjum sjö körlum og karlar eru fjölmennari í flestum tæknistörfum fjölmiðlanna. Á þessu eru þó undantekningar og eru nokkur tímarit og Fólk með Sirrý glögg dæmi um það. Að Fólki vinna að jafnaði tíu konur. Fer þar Sirrý sjálf fremst í flokki en að baki henni stendur vösk sveit kvenna sem vinnur þau fjölbreyttu verk sem unnin eru aftan við myndavélarnar. Sjálf segir Sirrý að þetta stafi ekki af sérstökum aðgerðum, mál hafi bara æxlast svona. "Hér á Skjá einum eru engin sérstök karla- eða kvennastörf. Konur eru aftan við myndavélarnar og í hljóðstjórn en þetta eru hefðbundin karlastörf á flestum miðlum. Hjá okkur ganga bæði kynin í öll störf og það vill bara þannig til að fleiri konur hafa valist til starfa í þættinum hjá mér." Sirrý segir þó hugsanlegt að sú staðreynd að framleiðslustjóri Skjásins sé konan Kolbrún Jarlsdóttir ráði einhverju. "Hún laðar kannski að sér menntaðar og færar konur. Hún þekkir auðvitað svo margar konur í faginu." Enginn munur er á að vinna með konum eða körlum að mati Sirrýjar, sem þó fagnar kvennafansinum í vinnunni enda umvafin karlmönnum á heimili sínu, þar sem eru eiginmaður og tveir synir. Hún er hins vegar þeirrar skoðunar að blöndun kynjanna sé affarasælust. "Mér finnast bestu vinnustaðirnir þeir þar sem konur og karlar eru í jöfnum hlutföllum og einnig fólk á öllum aldri. Andinn á slíkum stöðum er miklu betri." Konur eru oftar gestir í þætti Sirrýjar en karlar og blæs hún á þá bábilju að örðugt sé að fá kynsystur hennar í viðtöl. "Þetta er bara spurning um hvernig maður ber sig að og undirbýr viðmælendurna," segir hún. Og að sama skapi horfa fleiri konur en karlar. "Karlarnir eru hins vegar duglegri við að skrifa mér póst með ábendingum, hrósi eða gagnrýni og á því kann ég enga skýringu," segir Sirrý en gerir lítið úr þeirri tilgátu blaðamanns að þeir séu bara skotnir í henni. "Ætli þeir séu ekki bara hugaðri í þessum efnum."