Stjórnarskrárbundinn réttur

Það er fráleitt að halda því fram að ákvörðun um að virða gildandi skipulagsskilmála í Grafarvogi valdi lóðarhöfum við Fossaleyni fjárhagslegu tjóni. Þetta segir í minnisblaði frá Jónasi Þór Þorvaldssyni, framkvæmdastjóra Stoða hf., sem er lóðarhafi í Spönginni. Í Grafarvogi fylgja þær kvaðir skipulaginu að einungis er heimilt að reka matvöruverslun í Spönginni. Eigandi verslunarinnar Heimilisvörur, sem er á athafnasvæðinu við Fossaleyni, hyggst fara í mál við borgaryfirvöld vegna þessa. Júlíus Vífill Ingvarsson, lögmaður Heimilsvara og fyrrverandi borgarfulltrúi, telur tími sé kominn til að heimila öðrum að opna og reka matvöruverslanir í samkeppni við verslanirnar í Spönginni. Í minnisblaði Stoða segir að réttur lóðarhafa til þess að njóta eignar sinnar sé verndaður í stjórnarskránni. "Málflutningur lögfræðings, sem hefur auk þess reynslu af sveitarstjórnarmálum, um að víkja megi frá þessum rétti þegar uppbygging hverfis hefur farið fram er dæmalaus," segir í minnisblaðinu.