Launamunur jafnmikill hjá ríkinu

Ríkið hefur ekki staðið sig betur en einkageirinn í að útrýma launamisrétti kynjanna. Kynbundinn launamunur er jafnmikill þar og á almennum vinnumarkaði, karlar eru með 17 prósentum hærri heildarlaun en konur. Nýlega létu BHM, BSRB og Kennnarasambandið kanna starfskjör félaga sinna. Í opinbera geiranum hafa karlar tíu prósent hærri laun en konur. En það segir ekki alla söguna. Þegar litið er á strípuð mánaðarlaun, hjá körlum og konum í sömu störfum, á sama aldri, með sömu menntun og vinnutíma eru karlar með 7% hærri laun. Þegar horft er á heildarlaunin, eru laun karla 17% hærri, og er það skýrt með því að þeir fá frekar allskyns aukagreiðslur, eins og fasta bílastyrki, fastar yfirvinnugreiðslur og svo framvegis. Einu gildir hvort horft er á stjórnendur, sérfræðinga, skrifstofufólk, eða ósérhæft starfsfólk, alltaf eru konur með lægri laun. Þetta er svipaður munur og á almenna vinnumarkaðnum, til dæmis hjá VR, en þar semja flestir félagsmenn hver fyrir sig. Kjarasamningar þar eru ekki eins miðlægir eins og hjá hinu opinbera. Það virðist því sama hvort kerfið er notað. Ögmundur Jónasson, formaður BSRB segir skýringuna að hluta til vera þá að undanfarin ár hafi lögmál almenns markaðar hafa verið innleidd á opinberum vinnustöðum. Nýtt launakerfi hafi verið tekið upp, þar sem miðstýring sé minni og samningar hafi verið færðir inn á vinnustaðina, þar sem launaleynd ríki. Forystumenn eru sammála um að besta vopnið í baráttunni sé að afnema launaleyndina. Halldóra Friðjónsdóttir, formaður BHM segir að stéttarfélögin verði að hafa upplýsingar um laun félagsmanna sinna, því að það geri auðveldara að útrýma muninum.