Sakar Sjálfstæðismenn um spillingu

Sjálfstæðismenn voru sakaðir um pólitíska spillingu í snörpum umræðum á Alþingi í dag um kaup Landssímans á Skjá einum. Össur Skarphéðinsson, formaður Samfylkingarinnar hóf utandagskrárumræðu um málið en hann skýrði kaupin á þá leið að Sjálfstæðisflokkurinn væri að nota sjóði Landssímans til þess að hjálpa flokksbræðrum sínum úr skuldasúpu Íslenska Sjónvarpsfélagsins hf., sem ræki Skjá Einn og um leið væri flokkurinn að koma sér upp sjónvarpsstöð til framtíðar. Hann sagði sérfræðinga á fjármálamarkaði ósammála þeim fullyrðingum að kaupin myndu auka verðmæti Landssímans. Allir þátttakendur í hjálparstarfinu tengdust innsta kjarna Sjálfstæðisflokksins. Össur spurði Geir H. Haarde fjármálaráðherra hvað hluturinn í Skjá einum hefði kostað en ráðherrann fer með 99 prósenta hlut ríkisins í Landssímanum. Geir sagði áburð Össurar ekki svarverðann. Ráðherrann benti á að Landssíminn teldist ekki lengur opinber aðili heldur væri hlutafélag á samkeppnismarkaði. Því væri Símanum ekki heimilt að veita sér upplýsingar sem markaðurinn hefði ekki aðgang að. Hann kvaðst þessvegna ekki hafa upplýsingar um hvað Landssíminn hefði greitt fyrir hlutabréfin í Skjá einum. Stjórnendur Símans væru hin vegar að stykja hag fyirtækisins með kaupum sínum og gera hann að betri söluvöru. Steingrímur J. Sigfússon, formaður Vinstri Grænna spurði að því hvað Síminn væri eiginlega í dag. Ekki hlutafélag og ekki ríkisfyrirtæki. „Eitthvað þar mitt á milli eða hvað?," spurði Steingrímur og spurði hvort fyrirtækið gengi sjálfala og kæmi engum við. Sigurjón Þórðarson, þingmaður Frjálslyndra, sagði fjármálaráðherra hafa sagt ósatt þegar hann kvaðst ekki hafa vitað um kaupin. Hann hefði misnotað eigur almennings í pólitískri herför gegn Norðurljósum. Málið snerist um hreina og tæra spillingu. Halldór Blöndal sagði kaupin hins vegar opna fyrir það að nýjir aðilar gætu opnað sjónvarpsfyrirtæki sem gæti náð til landsins alls. Stöð2 og Ríkissjónvarpið myndu ekki lengur. Það væri forsenda frjálsrar fjölmiðlunar í landinu að opna slíkar leiðir.