Skutu í gegnum bíl

Sprengingar og byssuskot kváðu við á öryggisnámskeiði sem Rauði kross Íslands hélt um helgina fyrir sendifulltrúa sína. Á vef Rauða krossins kemur fram að starfsmenn sprengjudeildar Landhelgisgæslunnar, sérsveitar lögreglunnar og sjálfboðaliðar Rauða krossins hafi lagt sig alla fram um að gera námskeiðið sem raunverulegast. "Á síðustu árum hafa hættur sem hjálparstarfsmönnum eru búnar aukist verulega, eins og tölur um árásir á þá sýna. Byssumenn í Írak og Afganistan hafa beint spjótum sínum að starfsmönnum hjálparfélaga jafnt sem fréttamönnum og öðrum," segir í frétt Rauða krossins. Á hverju ári sendir félagið milli 15 og 25 manns til starfa erlendis, suma á átakasvæði. Nú munu til dæmis vera fjórir sendifulltrúar Rauða kross Íslands í Súdan, þar sem borgarastyrjöld geisar. Námskeið Rauða krossins sóttu sendifulltrúar auk nokkurra blaða- og fréttamanna.