Samnorrænn markaður æskilegur

Samnorrænn símamarkaður yrði til þess að lækka verð á símtölum og minnka reglugerðarfargan í löndunum. Þetta kemur fram í skýrslu norrænu samkeppnisstofnananna sem kynnt var í Kaupmannahöfn í gær. Í skýrslunni er meðal annars lagt til að samkeppnisyfirvöld á Norðurlöndunum leggi mikinn þunga í að aflétta öllum reglugerðum sem hamli samkeppni á milli landa. Slíkt muni leiða af sér minna reglugerðafargan heima fyrir þar sem aukin samkeppni geri eftirlit innan einstakra landa nánast óþarft. Í skýrslunni segir jafnframt að best megi sjá samkeppnisskortinn á Norðurlöndunum í því hve gríðarlegur munur sé á verði símhringinga innanlands og á milli landa. Með því að auka samkeppnina muni þessi munur smám saman fjara út, auk þess sem stór samnorrænn símamarkaður muni leiða til lægra verðs á símtölum til annarra landa í Evrópu og víðar.