Ofsaveður í Vík í Mýrdal

Á annan tug bíla stórskemmdist í ofsaveðri í Vík í Mýrdal í gærkvöldi þegar grjóthríð buldi á þeim, braut í þeim rúður og rispaði þá og dældaði. Þak fauk af bílskúr og ýmislegt lauslegt fauk um þannig að talsvert tjón hlaust af. Björgunarsveitarmenn unnu við hættulegar aðstæður fram eftir kvöldi við að hemja allt lauslegt. Rafmagnstruflanir urðu meira og minna á svæðinu frá höfn og suður fyrir Vík. Þá urðu talsverðar skemmdir á vinnuvélum sem notaðar eru við jarðgangagerð í Almannaskarði þegar grjót þeyttist yfir þær í verstu kviðunum. Björgunarsveitir voru kallaðar út í gærkvöldi til að bjarga fé sem var að fenna í kaf í Eiðaþinghá. Sumstaðar hefur heldur dregið úr vindi en ennþá er bál hvasst, til dæmis á sunnanverðu Snæfellsnesi og undir Hafnarfjalli.