Olíuvinnsla hér við land?

Eftir því sem olíuverð hækkar og ófriður eykst á helstu olíuvinnslusvæðum veraldar leita menn nýrra olíuvinnslusvæða á norðurhveli. Ýmsar vísbendingar eru um olíu og gas á íslensku hafsvæði. Hafréttarstofnun Íslands gekkst fyrir málstofu í dag um olíurétt og nýtingu olíuauðlinda í Norður-Atlantshafi. Meðal fyrirlesara voru sérfræðingar frá Írlandi, Færeyjum, Noregi og Grænlandi þar sem olíuleit er alls staðar á veg komin, ef ekki hreinlega hafin. Að sögn Sveinbjörns Björnssonar, sérfræðings hjá Orkustofnun, er vitað um gasmyndun í Öxarfirði og á Tjörnesi en ekki er búið að rannsaka það nóg til að vita hvort olíu og gas í vinnanlegu magni er að finna þar og á svæðinu á Jan Mayen hryggnum. Sveinbjörn segir vilja til að fá reynd og stór fyrirtæki til rannsókna en þau sé enn upptekin af öðrum olíuvinnslusvæðum á jörðinni. Hann býst þó við að það komi að því að menn renni hýru auga til olíuvinnslu á norðurslóðum. Eftir því sem minna verði annars staðar af hagstæðum olíulindum, eða meira barist í olíulöndum, þá færi olíufélögin sig yfir á svæði þar sem eitthvað sé að finna. Auk þess hefur hækkandi olíverð áhrif því það réttlæti meiri rannsóknarkostnað. Allt þetta eykur líkurnar á því að meira verði rannsakað hér við strendur segir Sveinbjörn.  Áður en hægt verður að veita leitarleyfi þarf að ganga frá lögum um slíkt, sem og reglugerðum, auk þess sem eftir á að ná samkomulagi um sameiginleg svæði. Landgrunnsnefnd Sameinuðu þjóðanna sker úr í slíkum málum en gagnaöflun stendur yfir og verður skýrsla að liggja fyrir árið 2009. Sveinbjörn segir ýmislegt hægt að læra af reynslu nágranna okkar í austri og vestri. Þó árangur sé kannski ekki mikill, nema hjá Noregi, þá hafi þeir aðilar reynslu, t.d. varðandi lög og reglugerðir. Úr því sé svo valið efitr því hvað henti best hér á landi.