Töluverðar skemmdir í óveðrinu

Töluverðar skemmdir urðu á bílum og húsum í miklu norðanbáli í Vestmannaeyjum í dag þar sem um tíma ríkti neyðarástand. Foráttuveður var einnig á Austfjörðum og er þar rafmagnslaust á stóru svæði. Á sjötta tímanum fundu björgunarsveitir tvo menn sem setið höfðu fastir á bíl sínum á Fagradal frá því í morgun. Vetur konungur ætlar svo sannarlega ekki að leyfa okkur að gleyma því að fyrsti dagur vetrar er samkvæmt dagatali næsta laugardag. Í Vestmanneyjum fór meðalvindhraðinn mest upp í þrjátíu og tvo metra á sekúndu og urðu vindhviður svo snarpar að um tíma þurfti að lýsa yfir hreinu og kláru neyðarástandi. Þak ÍMEX-hússins svo að segja splundraðist og dreifðist brak um miðbæinn. Bílar skemmdust svo og önnur hús. Björgunarsveitarmenn höfðu í nógu að snúast í allan dag. Meðal annars unnu þeir við að festa þakplötur á ÍMEX-húsinu og tveimur öðrum. Þá þurfti einnig að festa klæðningar á nokkrum húsum sem tekið höfðu að losna. Á austanverðu landinu var ástandið ekkert skárra. Þar tala björgunarsveitarmenn víða um að veður sé glórulaust og alls ekki til að ferðast í. Sérstaklega erfiðar aðstæður hafa verið á Fagradal þar sem komu þurfti nokkrum ökumönnum til aðstoðar í dag. Á Egilsstöðum var ráðlegt að halda sig innandyra í dag, enda snjóbylur og skyggni afskaplega lítið. Á Akureyri  hins vegar var snjór yfir bænum en fínt veður.