Óveður á Kjalarnesi

Óveður er á Kjalarnesi og hafa hviður þar farið yfir 40 metra á sekúndu. Í morgun valt vörubíll frá fyrirtækinu Fönn á hliðina í vindhviðu á Vatnsnesvegi á Kjalarnesi. Ökumaður bílsins slapp ómeiddur. Á tólfta tímanum fauk svo byggingardót úr ókláruðum sumarbústað yfir Vesturlandsveg. Þá hnikaðist annar ókláraður bústaður á járngrindum við Kjalarnes úr stað í heilu lagi en endaði ferðina við skemmu í nágrenninu. Við þetta er því að bæta að varað er við óveðri undir Eyjafjöllum þar sem veður fer hríðversnandi. Þá er óveður á Suðurströndinni, frá og með Vík í Mýrdal sem nær eftir öllu Suðausturlandi og inn til landsins á Austurlandi. Færð á vegum er víða slæm og á Suðausturlandi er stórhríð og ekkert ferðaveður víða. Fjarðarheiði, Breiðdalsheiði, Fagridalur og Oddskarð eru ófær. Á Norðurlandi er óveður í köldukinn og á Fljótsheiði og á Vestfjörðum og Norðurlandi er víða snjóþekja eða hálka.