Hannes sökkti Svíum

Þetta er önnur þrenna Hannesar í fyrstu fjórum leikjum Íslands í undankeppni HM. Hann skoraði líka þrennu gegn Búlgörum á dögunum. Hann var í leikbanni á Möltu síðastliðinn föstudag og sást þá berlega hversu mikilvægur hann er þessu U-21 árs liði. "Hannesar var sárt saknað á Möltu og hann er svona endapunkturinn í liðinu. Maðurinn sem klárar dæmið fyrir okkur," sagði kátur þjálfari U-21 árs liðins, Eyjólfur Gjafar Sverrisson. Hann segir að þótt Hannes hafi verið heitur megi ekki gleyma að hrósa hinum strákunum. "Hinir strákarnir búa til fyrir Hannes og fá að sjálfsögðu hrós fyrir það. Það var frábær liðsheild á vellinum í dag og ég er virkilega stoltur af strákunum." Það er óhætt að taka undir þessi orð Eyjólfs því það var frábært að fylgjast með strákunum hans í gær. Þeir börðust hver fyrir annan allan leikinn. Veitti ekki af þar sem þeir hafa tapað síðustu tveim leikjum á lokamínútu leiksins. Það var fyrst og fremst þessi stórkostlega liðsheild sem skóp sigurinn. Allir leikmenn liðsins áttu góðan leik og hvergi var veikan hlekk að finna. Þeir sem stóðu þó upp úr í góðu liði Íslands fyrir utan Hannes voru miðjumennirnir Davíð Þór Viðarsson og Ólafur Ingi Skúlason sem áttu báðir stórleik. Emil Hallfreðsson sýndi lipra takta og Sverrir Garðarsson og Jónas Guðni Sævarsson stigu vart feilspor í vörninni. Frammistaða Hennings Eyþórs Jónassonar vakti einnig athygli en allt annað var að sjá til hans núna en á Möltu þar sem taugaspennan virtist bera hann ofurliði. Það var jafnræði með liðunum framan af fyrri hálfleik enda bauð veðrið fyrstu 20 mínútur leiksins, úrhellisrigning og sterkur vindur, ekki upp á mikla knattspyrnu. Eftir að óveðrinu slotaði fóru liðin að sýna fín tilþrif. Sóknaraðgerðir íslenska liðsins voru mun markvissari og Svíarnir voru í verulegum vandræðum með að brjóta niður sterka vörn Íslands. Hannes kom Íslandi yfir á 24. mínútu með öruggri vítaspyrnu. Spyrnuna fiskaði hann sjálfur en varnarmaður Svía braut klaufalega á honum - ýtti á bak Hannesar án nokkurrar ástæðu. Svíar byrjuðu aftur á móti síðari hálfleik með miklum látum og uppskáru sanngjarnt jöfnunarmark á 54. mínútu er Alexander Farnerud skaut glæsilegu skoti fyrir utan teig sem Bjarni Þórður markvörður átti aldrei möguleika á að verja. Íslensku strákarnir létu markið ekki slá sig út af laginu og Hannes kom Íslandi yfir aftur fjórum mínútum síðar er hann sýndi af sér mikið harðfylgi í teignum, kastaði sér á boltann og kom honum í netið. Hann fullkomnaði þrennuna þrem mínútum síðar er sænski markvörðurinn skaut boltanum í Hannes og þaðan fór hann í netið. Vafalítið ekki fallegasta markið sem Hannes hefur skorað á ferlinum en það telur jafn mikið og öll hin. Það sem eftir lifði leiks hafði íslenska liðið öll völd á vellinum og var líklegra til að bæta við. Í raun voru Íslendingar klaufar að skora ekki fleiri mörk því þeir fengu svo sannarlega fín færi til þess. Niðurstaðan frábær sigur sem var fullkomlega sanngjarn. "Ég er ánægður með uppskeruna í fyrstu fjórum leikjunum. Þetta hafa verið mjög skemmtilegir leikir og það hefur verið fínn stígandi í okkar leik. Þessir strákar eru tilbúnir að taka framförum, ætla sér stóra hluti í framtíðinni og það leynir sér ekki," sagði Eyjólfur að lokum.