Tugmilljóna tjón í Freysnesi

Þakið rifnaði af 300 fermetra byggingu Hótels Skaftafells í Freysnesi í fárviðri í nótt og annað hús á staðnum færðist til á grunninum. Vegna veðurofsans urðu gestir að yfirgefa hótelið í brynvörðum bíl. Tjónið nemur tugum milljóna króna. Vindurinn á svæðinu fór yfir 50 metra á sekúndu í mestu hviðunum í nótt með þeim afleiðingum að þakið þeyttist af 300 fermetra húsi og brotnaði í spón. Flaggstangir og ljósastaurar brotnuðu eins og eldspýtur og spýtnabrak þeyttist um allt. Slík veður eru ekki eins fátíð og ætla mætti á svæðinu enda liggur það óheppilega við sterkum austanáttum og fjöllin í kring magna upp vindstyrkinn. Jón Benediktsson, eigandi hótelsins, segir það óskemmtilega tilfinningu að horfa á hótelið sitt svona útlítandi. Þetta sé hins vegar bara eitthvað sem verði að taka á og það verði gert. Það sé samt fyrir öllu að enginn slasaðist. Þrjátíu manns gistu á hótelinu í nótt og varð að vonum hverft við. Stærstur hluti þeirra er eldri borgarar frá Kanada á hringferð um landið. Einn þeirra, Joyce Autey, segir veðurofsann hafa byrjað kum tvöleytið í nótt; fyrst hvessti og síðan kom steypiregn. Allt fór að hristast og þakið losnaði og lamdist við gluggana. „Ég klæddi mig og var viðbúin öllu sem kynni að gerast,“ segir Autey. „Ég sá þakklæðninguna lenda en vissi ekki hvað það var. Svo heyrði ég þakið lyftast og koma niður með miklum hvelli. Þá vissi ég að tími væri kominn til að klæða sig.“ Ragnhildur Sigurðardóttir, leiðsögumaður hópsins, segir flesta hafa verið frekar hrædda þegar ósköpin gengu yfir. Allt hafi hins vegar gengið vel fyrir sig. Gestirnir voru fluttir niður í kjallara hótelsins og biðu þar eftir björgunarsveitinni. Hún kom á brynvörðum bíl og selflutti fólkið yfir í þjónustumiðstöðina í Skaftafelli þar sem það dvaldi í góðu yfirlæti fram eftir degi. Síðdegis hélt það svo áfram ferð sinni eins og ekkert hefði í skorist. Brynvarði bíllinn kemur frá þýska hernum og hentar sérstaklega vel til björgunarstarfa í fárviðri vegna þyngdar sinnar. Í dag komu fulltrúar tryggingafélaganna að skoða aðstæður en hótelið var vel tryggt. Það er ljóst að tjónið hleypur á tugum milljóna. Jón hóteleigandi segir, eftir að hafa ráðfært sig við smiði á svæðinu, að eftir hálfan mánuð eða svo verði búið að lagfæra skemmdirnar.