Deila öryrkja og stjórnvalda

Öryrkjabandalagið, heilbrigðisráðherra og stjórnarandstaðan eru sammála um að ríkisstjórnin hafi ekki staðið að fullu við samkomulag við öryrkja um hækkun örorkubóta. Forystumenn stjórnarflokkanna segja hins vegar að staðið hafi verið við samkomulagið. Það má draga þá ályktun að Sjálfstæðisflokkurinn standi einangraður í þeirri skoðun sinni, að búið sé að fullnusta samkomulag um hækkun örorkubóta sem gert var við Öryrkjabandalagið í fyrra. Í fréttatilkynningu heilbrigðisráðuneytisins þá sagði að gert væri ráð fyrir allt að tvöfaldri hækkun grunnlífeyris til þeirra sem yngstir verða öryrkjar. Í tilkynningunni kom fram að kostnaðurinn yrði rúmur milljarður á ári. Jón Kristjánsson sagði í samtali við Morgunblaðið tveimur dögum síðar að "enginn stjórnmálaflokkanna myndi einn eða í samráði við aðra flokka reyna að rokka við því samkomulagi sem gert hefur verið." Í ræðu 10 dögum síðar sagði Jón að samkomulagið gengi út á að tvöfalda bæturnar frá næstu áramótum og að þetta væri eitt af ánægjulegustu verkum hans sem tryggingaráðherra. Á þessum tíma lágu fyrir útreikningar í heilbrigðisráðuneytinu um að kostnaður við samkomulagið væri einn og hálfur milljarður. Sá útreikningur týndist í skjalabunka í ráðuneytinu en fannst síðsumars í fyrra. Í fyrrahaust sagði Jón að hann mundi standa við hluta samkomulagsins þá og lét milljarð í málið. Hann sagðist ætla að efna samkomulagið að fullu á næstu 12 mánuðum. Nú vill hann ekki segja hvort hann ætli að standa við þessi orð. Stjórnarandstaðan gagnrýndi stjórnina fyrir svik við öryrkja og Morgunblaðið gagnrýndi ríkisstjórnina harðlega fyrir að standa ekki við loforð sín og sagði að orð skyldu standa. Flestir sem komið hafa að málinu, og meira að segja mennirnir tveir sem handsöluðu samkomulagið eru sammála um að ekki hafi enn verið staðið við samkomulagið. Einu mennirnir sem haldið hafa því fram opinberlega að staðið hafi verið við samkomulagið eru þingmenn Sjálfstæðisflokksins; Davíð Oddsson forsætisráðherra og Einar Oddur Kristjánsson, varaformaður fjárlaganefndar.